اجلس وصدري مشرع للسحاب
مستتب ومستميت ومستريب
بيني وبين البشر بسمات ناب
وبيني وبين الزمن مشوار نيب
امس عقلي يعطي لقلبي خطاب
لين قلبي خالف اقوال الخطيب
عيش عمرك بين جرح واغتراب
بس لا ترضى تعيش لا حبيب
قال عقلي بس يا مال الذهاب
ماني امن الي ورا شورك ذهيب
جوز عن بنت أهلها من تراب
وازهد وكون النجيب ابن النجيب
لاتطيح لحبها لو انك مصاب
للمعزة خل في صدرك قنيب
النياق بظهرها سوط العذاب
بس ما تجزع وتعطيهم حليب
والجبال قممها فوق السحاب
وفاس فيها من بعيد ومن قريب
يا خفوقي اسقيك دمك شراب
ولا يطيحك المعاتب واللهيب
خل لك في لوحة الحكمه كتاب
وازهد وكون النجيب ابن النجيب
ما يعيبك مخطي واليوم تاب
بس يعيبك تايب وخطاه عيب
اطرق بمسمع غريمك هرج طاب
وخل طاري حضرتك يتلاه طيب
وقبل ترفع خشمك لفوق الهضاب
وتشعر انك شخص متميز عجيب
اذكر انك يا ابن آدم من تراب
والتفاخر بالنسب حاجة تعيب
غير دينك والدينك والكتاب
المناصب ما تودي او تجيب
وان لجمت النفس وانت بعمر شاب
ما تشيبك الليالي، هي تشيب