اللهم.. لا اعتراض ولا هوان
الفجر يشرق عليه...ماغفيت
ضاق صدري من مصايب ها الزمان
والعذر كاني منه نحت وشكيت
قاسيٍ باسه معي مايوم لان
يفجعك كانك عنه لحظه سليت
المصايب مالها سرج وعنان
من كثر ماذقت من همّ ارتويت
دبرة المولى..فيما قدر ..وكان
ومالنا فيما قضى يمكن..وليت
فيا بواحمد مافي ها الدنيا أمان
شف وطالع ..غدرها في كل بيت
يابو احمد ضاق من حزني المكان
وكل ماشفتك يابو احمد بكيت
ياجعل زوجتك في عالي الجنان
ويغفر لها كثر ما إنك دعيت
وهذي الدنيا ..ويالله المستعان
كل من فيها مصيره يوم ميت
عشت انا وياك كن احنا خوان
ياكبر قدرك بقلبي لوحكيت
في الوفاء والطيب لك فعل بيان
وفي المراجل اشهد إنك ماهفيت
السماحة والدماثة والحنان
والشهامة نلتها فعلٍ وصيت
ترثة اجواد لكم عز وشأن
مثلكم في الوصل ما عمري رأيت
والحظيظ اللي قبل فوت الآوان
من فعول الخير ماقال اكتفيت
والصلاة اعداد ما رفع الآذان
ع النبي وعد من شافو كميت
عبدالرحمن
عبدالله المجلي