لا انا باحلم بلبس جديد
ولا ساعه ودهب ف الإيد
ولا باحلم بمالي يزيد
وعربيه آخر موديل
يابابا نويل
أنا باحلم بلادي تكون
من أجمل بلاد الكون
وكل الصعب فيها يهون
ويبقى الحب ليها دليل
يابابا نويل
انا عاوز القلوب تصفى
واتمنى المريض يشفى
وفقير يشبع ويتدفى
ومافيش دمعة وجع بتسيل
يابابا نويل
أنا باحلم بمصر النور
ورافضه تكون شهادة زور
ولا مظلوم يبات ورا سور
ولا يإسر سماها الليل
يابابا نويل
أناباحلم بإيدنا ماسكه في إيديها
لشط سلام نعديها
دي خطوه وجايه بعديها
خطاوي كتير لرد جميل
يابابا نويل
ومش عاوز يكون فيه جراح
ولا نبكي على اللي راح
عاوزين نبتدي الإصلاح
دي دعوه لكل مصري أصيل
يابابا نويل