عديت في راس الطويل المطلي
اللي يوصف في دجا الليل لونه
عن الرجوم النايفه مستقلي
ترفاء الحرار أوكارها في ركونه
عيني على العالي واحب التعلي
والطيب عالي والنشاما يبونه
وغنيت يوم إن الغنا عادتن لي
اضبط معاييره واخفف لحونه
من خزنتن ماهيب تجرة مقلي
تاجر وعندي بالرمايه مرونه
ارمي ليا شفت الهدف بينن لي
رميت ذريفن بندقه من عيونه
ليا خطم للصيد جاب المجلي
عدل قطرها والنظر مايخونه
ولي صاحبِ غالي ولادري وش اللي
خلاه من يمي تغير ظنونه
ليا عزمته ما يشرف محلي
وليا بحثته في نقاشه خشونه
وازريت من راع الغوج والتغلي
اما امدحه ولا عطاني متونه
خله يولي والمولي مولي
ماينفع البايد لو إنك تصونه
مهف غرب مارجع يوم دلي
في راس حبل ذايباتن منونه
عود يلولح بالهوا يوم تلي
والغرب باقصى البير والجم دونه
ومهف طرش عند الاجناب خلي
متكانفينه باربعين معنونه
لقوه في وسط الفيافي مفلي
ما حال دونه من يعقد ردونه
ماني مطيعك يارفيق التسلي
دور خروف تسحبه في قرونه