يللي جوه نن عيني و قلبي ساكن
روحي ملكك و امتلك كل الأماكن
فوق شفايفي غنوه حلوه فوق لساني
قلتها من كل وجداني .. و لكن
يا حبيبتي جارت العزال عليا
يحسدوني ان حبك احلى ما في الكون و فيا
و ان حبك زي شمس الصبح تسطع جوه قلبي
و ان ريقك يا حبيبتي نبع ميه
يوم هنايا يا رضا ساعة ما شوفك
يرتعش حرفي و يرقص بين حروفك
و القى ايدي دايبه دوب في حضن ايدك
و القى خوفي كله داب في بحر خوفك
اضحكيلي خللي كل الدنيا ملكي
سمّعي العزال صدى ضحكك و ضحكي
و ان غفت راسي على صدرك سيبيها
عيني تنعس و الشفايف عاوزه تحكي
يا رضا كل الكلام الحلو ليكي
كل نبضة قلب بترفرف عليكي
و ان لاموني مهما لاموا أو لاموكي
اوعي يوم تنسي اللي بننا.. افتديكي