بنت الربيع الأخضر بتوحشني
زي الحياة ما بتوحش الأموات
زي البذور ف السنبلات
ما تنتفض وتحن
وإمتي كان للنهار فرحة
من غير بكا ف الليل؟
وإمتي كان الاشتياق بالسن!!
وأنا مش أسير ف السنبلة لحزني
لكن أسير الحلم بالإنبات
سكناني شهوة نبات
مشتاق لميه وطين
عدت عليه المواسم
ولسه مستني...
ساكن في قلب الحنين
مشعوف قوي بالغنا
ولبكره بيغني
من قبل خلق الكون
كل الميلاد كان سكون
سر القيامة جنون..
شاف الإله شكلنا ف الحلم فاستبشر
وكان مطر
وكان شجر اخضر
وكان خلقنا بكن فيكون
وكان آدم وكان حوا
وكان ولاد كتير وبنات
وأنا ف الخريف
بنت الربيع الأخضر بتوحشني
زي الحياة ما بتوحش الأموات.