تطاولوا بالروس(شُوْخْ البعارين)
الكل منهم صار شيخٍ وَلَد شيخ !
لو إن جِدّانه وربعه ( رعاوين !)
يقول أنا راع الفعايل و (أبا المَيْخ !)
يشطح وينطح ويتحدى القوانين
على الهواءوِ(يْذايخ)أكثر من(الذِّيخ)!
ويرقص وجمهوره خبولْ ..ووراعين !
ياللعَجَب في موكب الشيخ(طخطيخ)!
تاجر ..وكثْرت في الرصيد الملايين !
واصبح يبايستثمرالوضع..وِ(يْشِيخ)!
يُوْهِمْ عقول الناس..والناس دارين
لو كان يجلس وسطهم كنّه (التّيخ)!
البل لأهَلْها .. يالشيوخ الجديدين !
اللي وراها يضربون التخاتيخ
ماقَهْقَروها فالشّبوك إمتسلّين
ولا طبّلوا معها السّفاه(المفاصيخ)!
ولا جابها (السمسار)..وحده وثنتين !
بنات هرشٍ له سلاله وتاريخ
تريّحوا عن طردها فالميادين
وإنسوا (تَعَبْها) يالسّمان المرابيخ !
والشِّيخة اللي دون ساس ..وبراهين
ودّك عليها كلها .. تسحب الصّيخ !
شِيْخَةْ تَرَفْ.. ماهيب شِيْخَةْ سلاطين
أبرز مظاهرها تنافس وتبذيخ !
على حساب ضعوفنا ..والمساكين
رخْص الريال ..وقام سوق الطبابيخ !
يا (شيخ !) وقّفْ .. لاتْعَكْس الموازين
تراك ماانت بشيخ..لو قالوا(الشيخ)!
من وين جاك الشيخ؟من وين؟من وين؟
ياللي تبا (المرّيخ !) ماجيت مرّيخ !
وان كان عندك زاد في الكيس قرشين !
تلقى من ( البدَّه ) ضعوفٍ مصاويخ !
دوّر .. وتلقاهم ..تراهم قريبين !
وجنّب عن (الشِّيخة)ترى شِيْختِك (بِيْخ !)
شيوخنا اللي يطلقون المساجين
اللي لهم يوم الفعايل (مناويخ )
( رُوْس العَرَبْ ) لاصار للعِلْم تثمين
تزهاهم(الشِّيْخَه)ولِبْس ( الجبابيخ )
وشيوخنا اللي(مَشْيَخَتْهُمْ) على (الدِّين)
اللي على هدْي الشريعة شواميخ
اللي مجالسهم ورود .. ورياحين
والعود الأزرق مايجي فيه ( زرنيخ !)
نرضابهم ..واللي سواهم مْعَيِّيْن
لو يضربون صدورنا بالصواريخ !