لأن ما مرة فهموني
بس گالوا يفهموني ..
لأن اكتب شعر بالدمع عالحيطان
گالوا فات وكتك وانت مو صاحي..
أظن من صدگ كشفوني!
لأن صوت الاغاني براسي ما مسموع..
من شافوا رگص مذبوح
مجنون انا سموني ..
ولأن عفت القطيع وجددت ثوبي
مثل الماي فوگ النار بدّوني
وشمرت من العقل عادات تغريهم
خذوا مني البقن قطرات
ورى العادات ذبوني ..
ولأن عفت الورثته وصرت غير إنسان
من حرية الإنسان حرموني ..
وچي سمعوا كلامي بلا چذب ينگال
گالوا عني موش إنسان..
بأنواع الكلام.. بكل شي شتموني ..
ولأن صوت الصدگ ما يخضع لأي راي
ظل يحچي كلامي يفرهد الچذاب
والچذاب.. انا النوب تهموني!
تهموني بخيال الناي..
كتموا صوتي: "بچاهم؛ حزن ينشاف"
ووي كل الخطاية ببير شمروني ..
يلوموني
لأن ما مرة فهموني
بس گالوا يفهموني ..
لأن ضحكي حچي الخرسان
گالوا موت هاي الدنيا لليحچون
وغريب اطوار شافوني ..
ولأن دمعي النزل سكتة
عزيز وعافته عيوني
ولأن حزني انحفر بالروح.. ما ينشاف!
ما رادوا يهدوني ..
شافوا مني بس افراح
گالوا هذا بس للبيع
وبسعر الفرح للحزن باعوني ..
خلص كل عمري احب الناس
بس ما مرة حبوني ..
وولا مرة عفت لي إنسان
واحد ورى الآخر همَ عافوني ..
سهل وي أي بشر
وأفهم حچيهم زين
بس هم صعب سموني ..
يلوموني لأن إنسان!
لأن انسى واسامح
ما كرهت الناس
حتى اللي يكرهوني!
لأن گلبي وسع كل شي!
ولأن عمري انّذر للناس
حتى اللي يذموني!
لأن انا.. بقيت انا..
وولا مرة صرت همَّ!
لأن مختلف نبذوني؟
يلوموني
لأن ما مرة فهموني
بس گالوا يفهموني ..
من تالي وفطنت لها ولو عگبيش
أثاريها الأحلام أوهام بعيون الضرير
برمشة عرفوني.