منهم أمّر من حنظل القبور
ومنهم ألذ من حبق الجسور
حظ ونصيب، مفيهوش شطارة
ولو تاخدهم تجاره العمر كله يبور
منهم كما مننا المُرة والمزة والمُر والأمّور
زى القماش فيه حرير وفيه البفتة والدمًور
ياللى نويت ع السلامة، حاذر تجرب آلامي
" م الآخر اسمع كلامى "الصنف كله يغور"
أول ما تعطس تبوسك عشان تجيبلك كورونا
ستين سنه كنتوا فين؟ ده انتو نشفتونا
خدنا خلاص ع العطش، عجبنا طعم المرار
إحنا شجر صبار، من غير هزار "فارقونا"
طبيعى تيجى “الكورونا" للعالم المختل
تجار بتنهب شعوب ف حماية المحتل
وناس بتقتل ناس ع الكفر أو ع الدين
لازم يموت ملاين؟ عشان نفكر ف حل؟
كورونا مين يا غجر ده رأس مالكم أمّر
شردتوا بيه الشعوب، حروب وكر وفر
عايزن كورونا بضمير بينصر الإنسان
يرجع يعيشها بأمان، بعد انهزام الشر
فيه فيروسات واضحة جدا حتى للعميان
القهر والفقر، والجهل والجهر بالعصيان
إمتى بقى راح تهمدوا يا مطلعين عين أبونا
إيه تانى بعد "الكورونا"، يأدب الإنسان؟
يا كورونا حس، وخلى عندك ضمير
إيه اللى ريحك حتاخده من بلاط الفقير
جسمه اللى نادرة الزمان للغلب والتريقة
ولا جمال بسمته ف الشقا والهجير؟
حبة قرود كدابين بيقرّعوا على بعض
يتنططوا ف الهوا ويتشقلبوا على الأرض
ما لى ومال فرحهم وأنا قرد إنسانى
منعتنى أحزانى، إنى اشترك ف العرض
آه لو كورونا " مناضل" ضد راس المال
يجيب حقوق الغلابة وينصف العمال
تبقى بلاد واحدة، وكل البشر شركاء
ودنيا من غير غباء ولا بلطجة واحتلال!!
آه لو " كورونا" مناضل بس " مِطوّع"
ما هوش لبط قبّيض ومتلوّع
إنسان عزيز النفس م الأول
عمره ما يتموّل لو اتعرى أو اتجوّع!!
فى " الحبسة" تتأكد شكوك وظنون
البيت يا إما وطن أو بنسيون
واجهت نفسك فى مراية البيت؟
عرفت ليه ضحيت بالعمر يا مجنون
إيه اللى خدته لما بعت هواك
وقتلت شياطين الفرح جواك
اشرب بقى وحدتك ف الصمت
انت اللى خبت، عملت فيها "ملاك"
خدت الكورونا مننا راقة
ماكانش تحت الراقة غير أحزان
لقيتها طبعا مرة حراقه
جريت وقالت " حسرة ع الإنسان
واجعنى قلبى قوى على بشر حبُّوها /
هيه نِستهم وهما العمر ما نسوها /
لكن أكيد.. معذورة هيه كمان /
ما هو برضه شياطين الزمان هدّوها
لا لاقيها م الأصحاب ولا الخوات
"الصُرم طالع" من جميع الجهات
وأنا مش برىء، أنا زيهم معلول
"فيرس" علاجه يطول، اسمه عبادة الذات
كلتوا بضميركو حلاوة دى الوقتى راح تبكوه
بعتوا العراق واليمن والسورى شردتوه
أهوه جالكو رعب الموت وجريتوا ع الدروشة
والله لولا الخِشا لأفقع لكم " أ..ه"
سامحنا ف العمر اللى فات يا كريم
إحنا ارتكبنا المعاصى بس كان تلطيم
إدينا تانى برحمتك يا رب عمر جديد
ولو سقطنا، نعيد ونكمل التعليم!
يا رب عفوك سامحنا،ياما فرحنا ونسينا وعصينا
وياما انجرحنا وداستنا أحزان الحياة وعيينا
وانت خالقنا وعارفنا وكل شيء فى حكمتك وب إيدك
واحنا عبيدك غلابة، غلبنا الشيطان، ضلينا!!
يا كورونا أقولك تِحش مين الأول:
نصير طغاة ويمينى ضد الحياة وشِمالى مِتمّول
زُعمة دكاكين السياسة/ تُجار مآسى الجوع
سامعنى يا مفجوع؟، حّول!
الافترا ف الامتلاك عمى قلوبنا وعنينا
طمعنا ف المواريث وكلنا بعضينا
عايزين هنا / عايزين هناك
مع إن ساعة الهلاك المتر يكفينا!!
ما العن الخوف إن حكم.. صدقت يا بو بهاء
مفيش "ضمان ف الأرض" بس إحنا مش تعساء
أنت اللى قلت الضحك ساعة الموت يهد العدم
ورسمت " وردة بيت وطفل وعلم" وهتفت للشهداء
فيه ناس تقول إنك تحور لولبى
وناس تقول إنك تآمر أجنبى
لكن أكيد منتاش عقوبة ربنا
هوه خلقنا وحَبنا بس احنا تفكيرنا غبي