من قال ابي غيرك ومن قال ماابيك؟
وانت الذي بيحت مكنون عيني
مع كل خفقة داعي الشوق يدعيك
وشلون الوّح للوداع بيديني
روّضني الوقت العنيد وتغليك
ياللي تمخطر بالغلا فالوتيني
طشيت غيم الشوق واسقيت اراضيك
طاريك يستسقي سحابة حنيني
ماغير الاحي نايحات الشبابيك
طيرٍ بمكلوم اللحن يبتليني
واقرا بلهفة عن حياة الصعاليك
دربٍ مشوه بكل اسف يحتريني
اخذتني منّي وانا جاي ناصيك
جيتك قبل مرسول قلبك يجيني
واليوم هذ انا على حطّة يديك
القيظ قبل اروى قراحك رويني
بين الدروب انظر صباك وعواليك
لعل نسمة باردة تحتويني
اليا نخيتك بالغلا قول لبيك
وان ماتبيني حتى انا ماابيني
ياحي هاجوسٍ يجيني بطاريك
انحاش به واسج بيني وبيني
عل وعسى اكتب بيت مرموق يرضيك
يبقى اسواة الوشم فالساعديني
احلى الفرايد صاغها هاجسي فيك
ماكنها الاّ النيل او الرافديني
واحلى الوصوف النادره منك واليك
كنك سهيل ودونك الفرقديني
والبدر ماله طاري بعين مغليك
انكان ماهو من جبينك يبيني