خليك على عماك يا قلبي
إوعى تفتّح تشوف
لو قالّك معاك يا قلبي
قوله دا شيء معروف
لو قالك إنه عايز
يديك كل الجوايز
في الحب وفي الأمل
خليك ساكت وصابر
واكتم جواك وكابر
وحارب في الملل
متملّش من كلامه
مهما يكرّرُه
لو ينسى حرف منه
إنت تفكرُّه
ما الحب يا دوب حروف
تتقال في وقتها
وبعد ثواني تسأل
إمتى أنا قلتها
الحب يا دوب حروف
خليك على عماك يا قلبي
إوعى تفتح تشوف
لو دمعك ملاك يا قلبي
راجع تاني الكشوف
راجع كشف المدامع
دا تاريخ الحزن لامع
والغدر أهو انكشف
من يومها واضح وباين
مين اللي جارح وخاين
ومين اللى اتنسف
مين كان حزنه دايم
وحبيبه معذبه
وكان على عومه عايم
ودايمًا يتعبه
مش بكفاية الظروف
ونارها وغدرها
وأنا عايش عمري كله
بعاني منّها
مش بكفاية الظروف
خليك على عماك يا قلبي
إوعى تفتح تشوف