وادعيني وامسحي دمعة بعيني
الوداع صعيب لكن وادعيني
حاولي تنسين هاللحظة الحزينة
ولا بعدت بعيد عنك ذكريني
اكتمي العبرات عني لين أسافر
ماقدر أتحمل دموعك ساعديني
بالبداية لا تقولين انتهينا
فوق جرحي الأولى لا تجرحيني
ما انتهينا ما تفرقنا الليالي
قلبي بيدينك وقلبك في يديني
خلي لحظات الوداع تصير ذكرى
تبقى تذكار الوفا بينك وبيني
إنسي إنّا عقب لحظه بنتفارق
عن هوانا عن غلانا كلميني
يكفي لا تقولين بالبعد نتغير
ما نتغير لا وربي صدقيني
مابي اسمع منك للنسيان طاري
لا أبد ما أنساك لا لا تظلميني
أنا كيف أنساك أنسى حياتي
لو نست يسراي قصتها يميني
حبي أكبر حتى من كلمة أحبك
ماقدر أوصف لك شعوري سامحيني
كل دقيقه تمر وأنا بعيد عنك
عن سنه بتكون من سبّة حنيني
واسمعي الكلمات مني وردديها
أوعدك ما أنساك لكن واعديني