صعب النهار يجوع في كف الأيتام
لاصار طعم الليل ملح الصحاري
لو كل من يعشق تعشّم بقدّام
كان انزرع ظلّي بطين انتظاري
لكنّ بكرة مات حتى فالأحلام
تغيّرتْ معها رموز اختياري
ماهو قراري بس قرّرت ما نام
ولاهو صباحي كان يمشي قراري
بيني وبيني ليل وأحزان وأوهامْ
وفي عينها ماتت مكانة حصاري
تنشر غسيل الريح في حبل الأرقام
غيري ينشّفها وأنا أظلّ عاري
ترسل أذان الروح والناس نوّام
تسكر إذا صلّت.. وأصلّي سْكاري
مدري أنا المظلوم لا صرتْ ظَلاّم
منكوب حظّي وأنظلمْ باعتذاري
ما ألومها.. من يقدر يلوم الأيام
أصومها لو فطّرتني غباري
احبّها واشتاقها ثوب وكمامْ
وش عاد سوّت؟ ضيّعت لي زراري؟!
أدري قبل تدري كثير العزم هامْ
بين المواجع وانتهى بانكساري
أخاصر النجمة، والأفلاك لُوّام
وأضاجع القمرا، تعلّم نهاري!
يا علّها الراحة، تعبها من العام
جوعي رجوعي
راءْ! لثغة عذاري..!