غردي يالمشاعر بالمعاني النظيفة
علمّيهم مبرّر، نظمك اللي حداني
إمدحي المهرة اللي مالها من وصيفه
قولي للحاسد إنه ماله إلا، الأماني
أثبتي للي ما جرّب مصارح وليفه
إن الإبداع سرّه مندفن في المعاني
كل من لا يطول اللي بشفّه وكيفه
ذمّ في أقرب أصحابه وأهل المكاني
ياعذاب الفؤاد اللي تزايد رجيفه
طول ليلي أقا سي من عذابه وأعاني
أنتي تاج البنات وبك خصالٍ عفيفة
وأنتي رمز الوفاء ياساكنة في كياني
أنتي اللي تقلدني، بك العز سيفه
وأنتي معشوقتي من بين قاصي وداني
أنتي معنى الحياة وبك مشاعر رهيفه
فيك ذبح القلوب وفيك لمسة حناني
لو تمرين عند اللي،عيونه كفيفة
شاف قلبه جمالك واوصفه باللساني
أو رفع برقعك لفحة نسيمٍ طفيفة
يجهر العين خدك، لوهي رمشة ثواني
وان نظرك القمر في طلّتٍ لك خفيفة
غاب نوره وأظلم عقب ما كان باني
دوحة الحب لأجلك بالضماير مريفه
يا منى القلب والغاية بطول الزماني
الهوى حطه الله، بيننا بالنصيفه
نصف قلبك وقلبي صايرٍ نصف ثاني