مثل ذيك السنه وأكثر أنادي والنِدى : ما يفيد
ب قلبي شوق لو حسّيت به يقلب موازينك
أردّد " عيدك مبارك " عسى كل عام وإنت سعيد
وقلبي يرتجي وصلك يا غالي ، وفاقدٍ زينك
حبيبي هالزمن يضحك ، على جرحي وإنت بعيد
وجيت من الشتات أسأل بعد جرح الزمن وينك ؟
أنا ما جا على بالي غيابك إنت ب التحديد ،
{ عنادك } ليش ضيَّعني ؟ وقف ما بيني وبينك
لك الله ، كل ما أضحك ألاحظ ه الجروح تزيد
تصدِّق ضحكتي صعبه علي وسهله ب إيدينك
أقول إن الأمل : باكر يجي بكره ، بجرح جديد
ورغم كل السنين اللي مضت لي { تكرم سنينك }
أنا ما جيت أبي منِّك بعد جرحك تفك القيد :
أبيك تحس في قلبٍ رفض ينساك ويدينك
إذا يرضيك تستقبل بدوني فرحتك ب العيد ؟
شسوي ب قلب متعوِّد يشوف العيد ، في عينك
إذا عادي الزمن يضحك على جرحي وإنت بعيد ؟
على هذا البرود اللي تعيشه الله يعينك