في بلادي :
للبحر معنى ومغنى
للبوادي ،
والايادي البيض ،
وجباه الرجال السمر ،
في ظهر البحر والبر
تاريخ ومدى له الف معنى !
يابلادي :
يارفيف الحلم بعيوني
ويا أجمل سهادي !
علميني:
كيف احب اكثر ثراك الطيب المعجون
بافراح وقصايد شعر
مافيها خيوط بشوت وشرهات وعيادي!
علميني:
كيف اذا ضاقت علي الارض :
اشتاقك واشوفك اقرب الاشياء
في روحي
ومن روحي وانادي !!
في بلادي
كل ما يخطر على بالك
؟ وما لا يخطر على بالك بعد يا إنت ؟ :
عادي !
في بلادي الطيبة :
بعض الوجيه الكالحة تشرب من عروق العطاشا
كل قطرات البحر والرمل
وذرات البوادي!!
في بلادي :
كل شي جايز وممكن
لكن اكبر مستحيل انك تصير إنسان
ومايقتات لحمك :
تاجر ، وسمسار
- ياكثر يتغنى بالمواطن والوطن -
لكن يبيع البيت واهل الدار
في لحظة جشع :
خصوصا تَحت بند :
( الحْرمَنَة ولا الذكاء الاعتيادي) !!
في بلادي :
بَعْضنا مليان بالحزن الشفيف
وممتلي بال آه كاسه!
وبَعْضنا مستانسين وخايفين
من الفرح والضحك - في لحظة - تصير الإنتكاسة !
أو يموتون بسبب كثر الوناسة !!
يا بلادي :
يا علم رفرف جناحه فوق هامات الرجال الطيبين
الواقفين بصمت في طابور :
لايمكن قياسه !
يا بلد ما ينكرك إلا عدو ( ملعون ساسة (!
وما يشيلك فوق راسه :
غير أهل دارك إذا اشتد التعب :
وشافوا بالعطا راحة ضمير
إذا اشتكى الموجوع : باسه!
خايف الليلة اموت بضحك
من كثر الوناسة !!