عاد سيفى دون ربعى فالجراب
دون طيِّبهم ماهو دون مْعثور
وبندقي يحسب لثورتها حْساب
في خباها بندقي ماهى تثور
إن بغيت أقطع بها رمش الذباب
وإن بغيت أصد مقدى ومْعَذور
من رفع راسه من العدوان تاب
أرثمه وان زاد طرَّشت السّبور
من حكى مرَّة خَفَسْ ما عاد جاب
برقعوه وحذروه من الظهور
دون ربعي بالدروع وبالحراب
واتفرَّج في الزيادة والقصور
ما غَتَرْني لا عقاب ولا غراب
ولا سباع ولا ضباع ولا صقور
أرصد أسما ناس عندي في كتاب
وقد حفرت لخمسةٍ منهم قبور
وزمرةٍ بين التويتر والسناب
مالهم في غير جلب العُور دور
في حلوق أربوعهم رِعْوَ الرِّعاب
في الردى متعاونين وجنب ثور
من ظهر في ربعهم مثل العقاب
حولوه من الجبال إلى الوكور
شغلهم قطع الْسُن ودركام ناب
والدلال مراقبتها لا تفور
وان ظهر مبغض يسب سباع غاب
خمروا كنْ فوقهم مثل الطيور
وفيهم اللي يوم شاب القاف عاب
العجوز اللي تطيب بالفدور
مات صوته ما وصلني في السحاب
وراح عمره من دبورٍ في دبور
ست سبع سنين ويطير الضباب
ويتحسف كل نباحٍ عقور
والله إني فيك يا حشو الثياب
كون ما شوفك قبل يوم النشور
جعل يُسقى لانفتح من شرق باب
لجل أواجه كل مختالٍ فخور
واعطي أطيبهم ردا مني جواب
هو كفو للي سمعت إنه يدور
إن وكد عبيت حلقه بالتراب
وان تعذر ذلّ فان الله غفور
بس أنا ذالحين قلبي في الركاب
لاهيٍ بن الهجن.. هي والطيور
فالكلام الهزل سجلني غياب
في ملاقى الروس سجلني حضور