من لقلبٍ لا قبل الليل تغزيه الهموم
غزو جيشٍ قايده ناويٌ ذبحة عداه
أحكم الخطة ووقّت لتنفيذ الهجوم
واستعدوا بالذخاير وتقسيم الرماة
من تعرض دربهم من مطيحه ما يقوم
وكل سبعٍ مقتفي سيرهم يضمن عشاه
البشر بالليل ترقد وطرفي ما ينوم
مثل من يشكي الطواعين بالكبد وكلاه
طول ليلي ساهر أون وعدّ النجوم
من يراني قال مسكين هذا وش بلاه
يا حسوفي وين راح المطاليق القروم؟
الرجال اللى لهم بالوفاء هيبه وجاه
كل مخلوقٍ في الكون يفنى ما يدوم
والبقا لله جلّ وتعالى في سماه