والله ان عقلي ، رزين يازن ب وزن الجبل
والله ان قلبي رهيف خفته خف النسيم
احشم العقّال واغفل عن الرجل الطبل
وأتغيفل بعض الاحيان ، لو اني حكيم
غيرتني هالسنين ماني الشخص ال قبل
أحن لي أول مع اني على الدرب السليم
علم اللي ضاقت بْه الحياه واللي ذبل
والله ان ربك عظيم والله ان ربك رحيم
ياتي للقرم الشجاع نوب من صُلبه خبل
والخبل ياتيه من صُلبه القرمٍ العظيم
والبخيل اللي على ، شح يمناه انجبل
ياتي من صُلبه جزيلٍ عطاياه وكريم
صْقلتني هالحياه يومي في سن الشبل
فهمتني هالحياه خلك فطبعك حليم
احدِ يرضيه الأسف ، وحْد ترضيه القُبل
واحد مشقيه الضنا وهالشقى حلم العقيم
و احْد ممرضه الفقر و احْد ملياره دبل
و احْد مهلكه الهيام و احْد يتمنى يهيم
لا على الدنيا ملام ، ضاقت بكل السُبل
ضيقه الدجال ، لا من لمح بني تميم
يالله تعفو عني فيما بعد والي قبل
واهدِنا يالله درب الصراط المستقيم