( أنا أحتاجك ) ..!
وكل الدرب صارت لي
أشيل الشوق وأسارعْ
كل الأرض تندهلي
ماحد غيري بها الشارع
فطوري ( تمرة ) احساسك
وكاسة ماي بانفاسك
كأنك يوم ( تحتاجين ) : نخلة عمري الباقي
وقطرة ماي لأشواقي
يفطِّرني (شجن ) باقي
أجي ملهوف
أجي بين الرجا والخوف
أشيل الشوق وأسارعْ
أجي وآنا جمعت إحساس .. كل الناس فالشارعْ
( أنا أحتاجك ) ..!
مسافة حلمك اللي ضاعْ
ونبض احساسك الملتاعْ
ولون الشمس فعيونك .. إذا غابتْ ..!
يتوب الناس من دونك .. وما ماتابتْ !
حكاية أمسْ
كأنَّ الشمسْ ..
ماتسأل عن اللي يسكن الشارع
غصن ولهانْ
تغيب وينتهي يومي
تغيب ويبتدي صومي .. عن الحرمانْ ..!!
( أنا أحتاجك ) ..!
أخاف إنَّ السحاب اللي تعدَّى من ورى صوتي
سقى قبري قبل موتي
سأل ظلي
وقفت وجاوبه كلي :
( متى تاريخ ميلادك ؟
قبل شهرين
متى بتأرخ أعيادكْ ؟
قبل هلحين )
خلاص .. اللي أخافه صارْ
أنا شاعرْ
أحس ( بقسوة ) التذكارْ
أبجمع آخر أوراقي ..
وأجي للشارع الملهوف
أجيك بخوف
فطوري ( تمرة ) إحساسكْ
وكاسة ماي بانفاسكْ
أنا رغم اللي يصير وصارْ
أنا ناسكْ !!