الشّك فن التأمل باحتراف الهواة
البعض منّه خطأ والبعض منّه أكيد
من يسبر أغوار فكر الغير يلقى مناه
من يبحر بعمق في فكر البشر يستزيد
يعني نفك الرموز لكل شفرة أداة
الآدمي لا بدا بالكون يبدى وليد
خطوة بخطوة وخطوة يرتقي مستواه
الين يبدى العقل يرسخ بروس العبيد
والرمز له نافذه مهما يطوّل مداه
لو كان فيه الخبيث وكان فيه الحميد
يعم فيه الغموض ويختلف محتواه
يشب فيه الجمر ويهب فيه الجليد
يشع بالفلسفة عند اختلاف الرواة
لو كانت آرائهم تفوق حب الحصيد
والهاجس اللي يذب الصوت واسمع نداه
احسّه بداخلي يجري بدم الوريد
وش ذنبي إني كتبته وإجهله من قراه
رأي الجميع اقبله وافخر برأ ي الرشيد
من يبني الباب بالصحرا ويطلع معاه
حسب اعتقاد البشر انه مغفل بليد
لكن أنا أقول إنّه فاقهم في ذكاه
هو قسّم الأرض بعيونه وروّح سعيد
نصفٍ يبي يقطعه والنصف الآخر وراه
والناس ما تقتنع لو كان رأيه سديد