يا هاجسي بالشعر بالله مهلا
على الخفوق ونازفات الفتوقي
خلني على حسب المزاج اتملا
واختار من دانات عمق العموقي
اجيدهن من فكرتي واتسلا
واحبس همس إحساسهن في عروقي
إن عنت الأفكار والفكر علا
في نو قاف اللي تقافا بشوقي
أيطيب لي في منتهى الكيف ولا
أبقى على ناري وشمسي وذوقي
يا من دهاني الصدود وتولى
يا ليت لو تدري بوجدي وشوقي
حسنك ملكني في الهوى واستحلا
يا ليت تطلق يا مودي سبوقي
حرقت قلب من صدودك تقلا
مضى اللهيب وتم رسم الحروقي
تتجدد أشواقي إذا الشوق يبلا
مثل الشجر جدد غصون وعروقي
وأنا على صبري لها ما أملا
ما كثر ظلايمها وما ضيع حقوقي
ما كل ما يغليك عندك بيغلا
وما كل من يدعي صديق صدوقي
هيج شجوني ناظم في السجلا
صوته يلحن كايدات الطروقي
مثله أنا أهوى التحدي ويحلا
عندي واطريب للشدايد واتوقي
معاني للفاهمين اتجلا
تاتي عظيمه مثل ذوقك وذوقي