مش فاضل مني إلا حروفي
وشوية فكر
وضمير بيزعق ليه خوفي
مكتوب ع السطر
والأمل الداير بظروفي
مذهول من المكر
مش فاضل مني إلا مشاعر
رافضة تكون زيف
بتحذر قلبي يكون داعر
ما يكونشي نظيف
في الدنيا نمور بالناب واعر
طبعها تخطيف
مش فاضل مني إلا رسالة
أو نص وداع
العصر ما هوش عصر بسالة
ولا عصر سباع
أخلاقنا بقت تحت رزالة
والقدوة ضباع
مش فاضل مني غير همومي
تحرق في الصدر
وديون بتقطّع في هدومي
ولا طايقة الصبر
لا الحظ بيضحك لي ف يومي
منتظر القبر