عزوم الكبار تزود يوم الخطر يزداد
لو ان الصغار تضيق باصغر دعاويها
عيون العزيز تناهض الوهن والاصفاد
وعين الذليل ان شافت العز يعميها
حقوق العرب ما ترجع بحكمة النقاد
ولا بالشعارات وجزالة معانيها
تبي حكمة السيف الذي يرعب الاوغاد
الاوطان غير السيف ما شيّ يحميها
فلسطين نفداها بالارواح والاولاد
ومهما بذلنا لاجلها ما نوفيها
سلامي عليها نابعٍ من صميم فواد
لكل القرى فيها وباقي بواديها
على القدس أولى القبلتين السلام يزاد
على غزة العزة بكامل ضواحيها
صمود الجدود اللي تورث مع الاحفاد
نما في حما أسدٍ عظيمة هقاويها
فيا كاتب التاريخ وقف على استعداد
وشوف بعيونك قصة الفخر وارويها
هنا منبع العزة هنا منجم الامجاد
هنا حاضر الأمة يبي حفظ ماضيها
هنا استنسخ التاريخ عنتر ولد شداد
وجاد الزمان بثلةٍ حي طاريها
هنا الجود معنى غير عن باقي الأجواد
تجود الاسود بروحها دون اراضيها
هنا للخيال حدود ماهي من المعتاد
لكن الحقيقة ما لها حد ينهيها
هنا ينشد المدفع قصيد بلسان الضاد
ومن بعده ترد البنادق باغانيها
هنا يضحك المسجون ويبكّي الجلاد
والأشجار والأحجار تردع معاديها
هنا يتعب الشاعر ويعجز عن التعداد
ليا حاول يعد المآثر واهاليها
فلسطين دامت شوكةٍ تنخز الحساد
بها كل حاجة غير من فضل باريها
عسى الله يشفي جرحها والنزيف الحاد
وتبقى ترف اعلامها في روابيها