رد التحيه لفهد
ساير الظفيري
قصيدة فهد ساير الظفيري :
بعض الحديث اللي تزايد همه
حتى الجبل من سبته متهاوي
حاولت ايممها ولا لي يمه
ياكود يمك يا اكرم التلاوي
شاعر فحل طب القصيد وتمه
له بيرق بين البيارق ضاوي
بسألك عن عود كبير كمه
اسس حضارة عالم صحراوي
نوره سطع واجلا الظلام ودمه
خيره كثير وبالعدل متساوي
كسر مجاديفه صغير زمه
يسمع كلام المنحرف والغاوي
شفت العجب في عالم ملتمه
الذيب ينبح والكلاب اتعاوي
كانك عرفته يارفيقي سمه
ضعنا مابين المحترف والهاوي
ماهمنا مدح الرجال وذمه
القلب ينبض والهوى حفراوي
ردّ الشاعر أكرم التلاوي :
بعض القصيد اليا لفاك تضمّه
باقصى الحدوب اليانعات بياوي
وبعضه يشكّل في حضوره أزمّه
كنّه على ضيقك وموتك ناوي
وبعضه بترقى له تبوّس خشمّه
لا جاك من شاعر قرم حفراوي
يا فهد جيتك والمشاعر جمّه
في صدري المتهالك المتهاوي
يوم الشعر مانيب لاف يمّه
وما كنت قاوي مير لجلك قاوي
أجمع شعوري وانثره وآلمّه
لاني بناظم للهرج أو راوي
إللي يِطُبْخَ السُم ذايق سُمّه
ما فيه شاعر له قليب خاوي
نشدتني عن عود صاحب همه
أسس حضارة عالم صحراوي
يا فهد عود واسفكوا له دمّه
بين الحداثه والقديم الذاوي
تناهبوه وهالعرب ملتمّه
كنه سبيل وما إله من حاوي
هم أدلجونا يا فهد والطمّه
غاوي يأدلج في قصائد غاوي
الورد كِل الخلق تعشق شمّه
ما كِل من شمّه بزرعه قاوي
يا فهد خلّي جروحنا ملتئمّه
القلب ينبض والهوى تلاوي
ذي رمعتي وكنّي عجزته سمّه
العلم ما يبقى بدفنه ضاوي