تغادر للبلاد لي وين
حبيبنا غالي أسمر وزين
حليل أيامنا مجتمعين
ودايما باقي إنت حنين
أبوك في سجنه باكي حزين
وأمك بي عيون دامعين
ولا خلينا زهراوين
بقدرة الله ليك حافظين
حرزك إن شا الله إنت يا زين
تغادر شاطيء النيلين
نسايمه عليلة بالياسمين
تسيب بيتك تروح لي وين
ما أنت الضي ونور العين
وليك أحباب هنا حلوين
تخلي الدمعة في العينين
تملا بغصة صدر حنين
لو شرفت جيت يا زين
نان العيد كان بقى عيدين
أبوك باكي شاكي حزين
وأمك دامعة العينين
تفارق النيل وتمشي لوين
أرض لأبوك والجدين
حليل الكانوا لينا جبين
وحياتنا الحلوة بيهم لين
صباحك جوري والياسمين
ومساك قرة للعينين
يردك ربي مال وبنين
قضينا الليل معاك تفكير
وصباحنا باقي لينا هجير
حماك الله عظيم وقدير
ويحفظ للكبير وصغير
عسى ولعل تلقى الخير
ييسر ليك كل عسير
بحق رضاهم الوالدين
وحق ضراعة القلبين
ينفعوا في الضيقة للغاليين
أريت الغربة عني تطير
ما عاوزين قروش الغير
تبقى في بلدنا أمير
حتى لو ركبت حمير
كل من يختى عليك يا خزين
ترد الصاع بلا تفكير
ولا خوف من صغير وكبير
ولا غصة قهر لحقير
بجوفك ذي حريق بنزين
بدينا حياتنا نحن اتنين
أمك وأنا يا خزين
وبعد ما بقينا عمرانين
تطل علينا فرقة وبين
رجعنا بعد سنين وسنين
لنفس الحالة نحن اتنين
نعاين لي بعض ساكتين
وعايشين والله حيرانين
نجر السبحة نطفي أنين
بفكر يوم يجيني الموت
وأترك لي دياري أفوت
بفكر في البنين بنوت
ساعة قالوا قطع القوت
حليل الكان وديع وسكوت
يسامح الغير ولو هلفوت
يموت في بُعدهم نكرة
وما يلقى من ذكرا
مناقبه الفاتت العشرة
عليك الرحمة يا مسكين