أنا تمنيتك لي العمر كلّه
والحب يغمرنا بشمسه وظلّه
ما كنت أظن في يوم هذي الحكاية..
بكلّ ما فيها تصل للنهاية
صعبة علي أنطق بها للمرآية!
صعبة علي أقول.. ودعتك الله
شفت السعادة فيك وارتاح بالي
رسمت أحلامي معك في خيالي
ولو بيدّي أمنية.. بس أبيها
شوفي عيوني زين وتأمليها
تلقين فيها أغلى من شفت فيها!
صعبة علي أقول.. ودعتك الله
بتذكّر اللي بيننا طول الأيام
وأضوي لنا شمعة من العام للعام
هي ذكرياتي، لو غدت حيل مُرّة
ما أشوف غيرك لو أشوف المجرّة
بصغي لقلبي وأسمعك كلّ مرّة!
صعبة علي أقول.. ودعتك الله