معانا في اليمن مجلس رئاسي
مقضي معظم أيامه وناسة
عددهم حطم الرقم القياسي
مع الواحد مية جني براسه
كما الحوثي في الخسة خساسي
ولا فيهم ذكاء ولا فراسه
وفي صنعاء وقع لأجل الكراسي
دراما طعموها بالحماسة
وهم مجلس ولكنه سياسي
ولا حد منهم فاهم سياسة
ولا به منهم ذيب الغلاسي
اتو للشعب من سوق النخاسة
به المشاط أبو العشر الحواسي
مكثف حوله انساق الحراسة
تسبب بالمجاعة والمآسي
بقلة دين دارسها دراسه
ومِنه جا للوزون ٱحتباسي
ويستورد سموم ٱهله وناسه
صرخ حق السيادة لا مَساسي
وهو من قم إيراني أساسه
وفي صيرة عدن مجلس سداسي
بمشروع انفصالي شد باسه
عدن في عهدهم صارت تقاسي
من الويلات صابتها انتكاسة
ورغم الوضع شعبي شعب قاسي
إذا زاد البلا زدنا شراسة