ياقلب لا تِصخر مع الناس بالحيل
تِصخِر ولكن للأسف يهملونك!
جتني بيوت الشعر خيلٍ بثر خيل
حجلٍ وساع نحور تبغى تصونك
مسرّجه يفتر لها العزم والحيل
ركّابها عقلٍ تشوفه جنونك
من قال بين الناس لاتامن سهيل
كل البلا والغدر.. باللي يجونك
هذا اليماني فوق.. شامخ عن الميل
يا الآدمي ادعَك وفتّح عيونك
ترا اندفاع الدرو مع جرّة السيل
يجتث عشب الأرض لوكان دونك
ولّى زمان رجال عاشوا حلاحيل
واليوم حتى رمش عينك يخونك
أهون عليك تخاوي النار والليل
ولا تجالس اللي بالقفى يطعنونك