قل وحدتي ثوب مومكوي. وسخ كمي
قل: منشفه بالية. قل: فرشة أسناني
أسوّي الأكل وحدي... وحدي آسمّي
ملعون أبو السفرة اللّي مابها ثاني
ويني أنا. آآآه... قل وينه طبيخ أمي
يا غلطة اليتم... ليت اليتم عدّاني
أمشي. ولاوين. مدري... بس نشف دمي
قل طز. في عمر خذ مني ولا اعطاني
الهم. ماهو في اللّي قلت... يا همي
الهم... فيما بغيت آقول... ممداني
يا عم طنّش... وكم طنّشت. يا عمي
يا كبرها دمعةٍ... من عين زهراني
لا ورب البيت... والهم... وسريري
لا ورب الحزن... وأمواس الحلاقة
جيت أجمّل وجهي البارح. لغيري
شفت وجهي... ماله بوجهي علاقة!
ليه الوجع... أو مزاجي. ليه متقلب
عزّابي إن ضقت... وان ما ضقت. عزّابي
أكنس. وارتب. وأنا ماني بمترتب
أغسل... وأنا ناسي الأوراق بثيابي!!
هنا جرايد... هنا علبه... هنا شبشب
هناك باقي الغدا... وهناك شرّابي!
ما فيه أحد دق بابي. إيه... ليش اكذب
بسّ الفواتير. هي بس... عارفه بابي!!
للناس مستقبلٍ... تمشي. وتسعى له
الاّ أنا... عايشٍ مستقبلي: ماضي
يلعن أبو الهم... والدخان... وسعاله
واقداري الغصب... واللّي عشتها راضي
يا وحدتي... ما سألتك ليه هالحاله:
طفايتي ليه مليانه... وأنا فاضي؟!