البرد يملاني حنين
ويمتلي صدري شعر
أبيات ما أدري لمين !
موزونة داخل منكسر
هذا شعوري من سنين
وهذا هو نفس العطر
والقلب من حين ٍ لحين
ينادي بآمال اشكثر !
عاش انتظاراته حزين
والمشكلة وش ينتظر ؟
إن كانها شمس بتبين
بانت ولا فيها نظر
وان كانها غيمة أنين
معْ كثرها وين المطر ؟
صحيح ليْديني يدين
وايْديني عشرتها عشر
وفي كلّ عينٍ ليّ عين
ومعْ كل ذا أبقا بشر !
أمشي ولا أدري لوين
والدرب لو يسهل خطر
يشين حالي لو يزين
ويزين لو شان القدر
متناقض فْبرد الحنين
وممتلي صدري شعر
هذا شعوري من سنين
وهذا هو نفس العطر !