انبلج نور القريحة وانبعث بين السطور
يسبح بفلك البيان ويسرح بمحميَّته
استباح ابكار فكرٍ غاص في غب البحور
امطر بجزل المثايل والسعد في جيّته
القصيد بغير تجسيد القيم قاصر حضور
لو تجمّل في مبانيه وطرب قافيّته
أبشع انواع البشر من كان مختالٍ فخور
يرتدي زيف التواضع يدّعي عفويّته
البليد يخدّر اوجاع الحقيقة بالغرور
والمسكّن ما يفيد قلوب ناسٍ ميّتة
الغصون ان كان ما تثمر وش تفيد الزهور؟
الجمال الخارجي فاقد لمصداقيته
الفراغ اليا امتلى بالوهم واجتاح الصدور
تصبح الاوهام موطن مفعم بحنيّته
الورم يعجب عديمين البصيرة والشعور
لكن بعين الذهين يبان وش ماهيّته
الاماني تخدع المسكين لين يعيش دور
امبراطورٍ يبي حفظ امبراطوريّته
من يشوف المنكبين اشباه جنحان الطيور
يبغض الواقع ويظهر وجه عدوانيته
كنّ في عينه ضباب ولا تحب تشوف نور
من تعايش مع ظلامه - جهزوا مرثيته