ياوطن عاوز اقوللك
مشتهيك مشتاق لضلك
مشتهي الناس الغلابة
الجائعين سيرهم محلك
مشتهي النيلين وحاتك
مشتهي الحن في صلاتك
مشتهي الشعب البعاني
من زمن تحريرها ذاتك
كم حكومة جات عليهو
همها الوحيد تقنب
فوق صديرو ولي فناتك
هي تسعي وماها دارية
بالحيحصل يوم مماتك
مشتهي ارض المحنة
عطبرة الكانت عصية
علي جميع من مر فكر
يسلب العمال قضية
هي المدينة الرضعتنا
انو نحفظ للهوية
نبقي ثايرين طول عمرنا
ونبقي حافظين الوصية
اما دامرنا العزيزة
فليها من خاطري التحية
والاماني انو تنهض
تنتزع حقا قديما
توصل السما والثريا
وجوة امدرمان بنادي
للعظام الصدقو نية
كانوا تاريخا يؤكد
انو انت عبقرية
سبقة ازمانها بسنيناً
في الحساب هم فاتوا مية
الملخص ياحبيبنا
انت اديتنا المناعة
ضد جميع سخف التسلط
ضد اساطيرا مشاعة
انو نحنا ما بنقدر
نحكمك ننشئ صناعة
تبقي للثوار كتابا
جد مقدس وما بضاعة
يسعوا بيها الإرزقية
جوة اسواق النخاسة
المسخت عيشنا بصراعها
حول سلطة وجاه هو زايل
طالما الدنيا وشراعها
يبقوا معتمدين بشدة
علي رياح تغيير بتظهر
كلما حصلت فظاعة
في معالجة لي قضية
او في حاكم مرة باعها
ياوطن ليك التحية
وليك قصيدة حب مذاعة
قربك انت فيو سعادة
ودونك الساعات مضاعة