من صجّة الشارع .. ومن ضيقة البيت
ومن حر شمس الصيف نصطاف فيها
هي مقصد اهل القنص واهل المكاشيت
لا اقبل علينا الصيف .. نركض إليها
ومن تحت خيان اثلها .. لاتذريت
كنّك وسط لبنان ... الله عليها
ومن جحها .. ورمانها لا تشهويت
تاكل .. ومن هو ذاقها مانسيها
ومن العنب عنقودها يزهمك هيت
من ريحها .. من طعمها تشتهيها
وبركاتها لاصرت جنبه .. وطبيت
من كبرها .. من عمقها تضيع فيها
من قال للدغمانية نروح .. فزّيت
وبسرعة ٍ جهّزت نفسي .. ابيها
وعلى اظِهرته بالمساء كم تقهويت
مع شلة ٍ باغلى الذهب تشتريها
وقت ٍ مضى مافيه حزن وتناهيت
اعوام تركض .. والزمن مقتفيها
املاك ناس إكرام .. عالين بالصيت
الراشد آل حميد .. تعبوا عليها