طبع لنا مانواجه الحكي بسكات
كل يقدم وجهته وانطباعه
محد طمع في العمر لولا الملذات
ولاحد زهد بالعمر لولا الخشاعه
الارض تفنى وساكن الارض موات
ولا كل ورث اللي توفى متاعه
الحي حي الذكر لو صاحبه مات
والميت اللي بالردى الذكر ذاعه
عندي على قولي براهين وثبات
يقنع به اللي يستحيل اقتناعه
محد مثل حاتم بذكر الكرم بات
ولا حد مثل عنتر بذكر الشجاعه
واحلامنا لو هي كوابيس واهات
ولا زادت من الواقع الا بشاعه
فالموت غمضة عين والعمر لحظات
والقبر ضيق لو تزيد اتساعه
شفي ليا من زاد بي العمر باذات
بنت تزملني على كل راعه
تاقف بجنبي يسر ونجات عسرات
وتصبر على وقتي ليا شح باعه
وتعين صاحبها على كل خيرات
وتزيده ايمان وتقوى وطاعه
الارض وابن ادم لهم خلف ونبات
ذر الفتى بذره ليا احسن زراعه
اللي زرع خير جنى منه جنات
واللي زرع شر جنت به ذراعه