اكتبي لي

اكتبي لي

وبيد اطفال شارعكم

دودي لي رسالة وبيها اخبريني..

تعب يومچ.. مثل يومي؟

ملل ليلچ .. مثل ليلي؟

وشنو أخبارچ احچي لي؟

حزن روحچ.. فرح گلبچ..

مواقف حلوة.. مو حلوة ..

بكل شي قابل.. احچي لي!

دحنّي لگلبي يفلانة

وافتحي للعشگ بابه ..

ودودي لي ظرف

بي من ظفيرة شعرچ الغابة

يكل شعرة..

حبل أمنية للمشنوق

چي وده حلال علي

وودي لي

نهد منچ..

دفو حضنچ..

عطر جسمچ..

يهنيال القميص العايش يغطي

وودي لي جفن عينچ أضحكنّه

اذا مر الحزن

لو قاصد يبچي

ووديلي ترف خدّچ أبوسنه

اذا مر الدمع يسگي

ودّي لي ولو شامة.. ولو لمسة

ولو ضحكة من شفافچ ولو همسة

ولو بوسة.. ولو صورة ..

ولو بس ورقة مكسورة ارسلي لي

بكل شي أقبل يجي منچ

ولو حتى ظرف فارغ تودي لي

أيفلانة

بدونچ لحظة ما اگدر

وما أندل بلا مرسال

انا بنص البحر

والروجة تاخذني

اذا ما چلِّبت بيدچ ادَيَّ أطفال

اذا ما چلبت بيدچ

باديمن ايدي تچلب؟

أدينچ من تمديها

بعد يا روجة تاخذني واديچ احبال!

يهلالي وانا بهيمة

سماي بلا ضحك عينچ

تظل ما اظن يجيها هلال

ومحد غيرچ يگلي اجاني العيد

محد ينشد اعلى الحال

ويفلانة

اذا صار وتفارگنا

ولو متصير

لكن كلمة التنگال

يفلانة تردّيلي؟

واذا رحتي وتركتيني ترجعيلي؟

يظل گلبي يخاف الحب اذا رحتي

اذا رحتي اكتبي لي

طريقة لعمري اشرحي لي

وبدونچ أعيش شلون؟

وعلميني

شگولن لليذكرونچ اذا يدرون؟

أگولن ترجع وأضحك؟

لو ما ترجع.. وأخجل؟

اظلّ متاني.. لو أرحل؟

وأيّس ما تردّيلي؟

أيفلانة ترى گليبي

تعوّد عالحچي المنچ

فلتگطعين ..

أيا صوت الندى لو فزز العطشان

وانا وگلبي عطشانين

ارسلي لي

كلام يسكت العطشان

يا أول رسالة ماي

وبكلمة عشگ تروين

يكل عمري فدى لعينچ

وانا بشحة ندى العشرين

اكتبي لي واذكريني

وأسگي لچ عمر وسنين

احبچ يا خبر رجعة

أحبچ يا رسايل من جنود لأم

يهلهولة.. وضحك دمعة

أحبچ يا شعور

الما عثر مرة بصدگ بالناس

وخلص عمره بس مخدوع..

وهسة بلا چذب عايش ..

أحبچ يا صدگ يا آخر الخدعة

أحبچ يا شمس ليلي

أحبچ حتى لو شمعة

وأحبچ لو طفى الكل شي

ظلامچ كلّه ما اشوفه

ولا اسمعه ..

أحبچ يا وطن گلبي

أحبك.. هيچي گلي لي

لحتى أبقى لحد الموت

امدن گلبي للدنيا

واوزع حبي بشليلي ..

أحبك..

دوم گلّي لي.