الله أكبر يا زمان المدح صوتًا وصورة
خلّت المهبول يرقص فاقدًا لشعوره
ما درى أن المدح بالبهتان مثل السبّة
والقصايد ما تَرَقّع حاجة مشتورة
أغلب الشعراء كذّبه في هذا الزمان التالي
والمصيبة كثر شعاره مع جمهوره
استوى في المدح من يسوى ومن ما يسوى
يمدحون اللاش واللي ما يقوم بدوره
يعرفون المدح ما هو له ولا هو حوله
غير يبغونه يشوش ويدفع الفاتورة
الكريم الشهم رأس القوم راع القالة
الصحون صحون جده والقدور قدوره
يوصفونه بالشجيع القرم مقدم ربعه
ويمدحون الكندرة والبشت والباكورة
وانتشى بالمدح من جهله وقام يهابد
ولا ذكر عنده فعول أو وقفة مشهوره
يا بشر خفوا على الناس من الهياط الفاضي
خلوا أسرار العرب في بيرها مستورة
والله يا من يمدحك بالكذب ما يتورع
أن يذمّك لو تصب السمن في حنجوره
دورة الأيام تظهر كل شيء متخفي
والليالي تظهر الأشياء وهي مطمورة