ريحانة على شط البحر قالت وش بيك

ريحانة على شطْ البحر قالتْ وش بيكْ

يا بحر االتنّزاه وشبيك أمهوّلْ

ياك الناسْ بهمْهّا تحكي واتجيكْ

وللّي يطبخْ داخلو حرّْ المُشكلْ

ريحانَة عفي جدّي ماذا بيكْ

هم أهمومي . حليلْ سعاتْ ونهْبلْ

أنتوما ياناسْ كيفاه أنوريكْ

إللي عندو هم بالدمع إيوَّيلْ

هذا غدرتْ بيه ها لحبيبَة ذيكْ

وهذاك المسكين في الحبْ أتكبلْ

وهذا راحْ المال الله لايبليكْ

وهذاك المدْيون ْ غدوة يتسلسلْ

وهذا يتسلا لاعبها ماجيك

قودام ليشّيرات . للصدر يكَّسلْ

ما يعرف ْ للعوم سبعْ التيتانيكْ

ها لاعبها "جاكْ" في "روز" يهبلْ

راني شايبْ م الدواخل وش نحكيك

لوكانّْ نحكي حتى صخوري تزلزلْ

يا ريحانة وينهم ذوك أوماليكْ

اللي تعرف . للبحر و تتأمل .

وين أهل القيتار وقصيد إيواتيكْ

هاوين الصيّاد بالحبْ يحللْ

وين الرّجلَة وينهم اهل تموليك

وين اهلْ المعنى شعبي يتدللْ

راني كاره ياختيي ضركْ أنخليكْ

لازم همي موج ع الصخر يجلجلْ

من يفهمني قليل ريحانة مثليك

هاني رايح . لحزان بالموج أنكملْ