يا أهل البلد فلقتوني
يا مسلمين غلبتوني
إن عبت فيكم تلوموني
وتجعلوني من المجانين
قلتولي دا احنا أزكية
وعندنا حسن النية
والمصري يتعد بمية
م الناس أخص الشرقيين
أمال دا أيه اللي بيحصل
دي حالة عايزة تتفصل
داء السخافة متأصل
فينا وماسك في الشرايين
بشوف يوماتي بعنيه
فكي السكة ساعة العصرية
موكب وفيه عربية
راكبين عليها عيال حافيين
تعدي قلبه الجمالة
والطلبة فوقها شغالة
والنقرزان والرجالة
من الفتوات الصايعين
وبعد منها جمل أزعر
وفوقه علبة مرات عنتر
قدامها شيبوب يتمخطر
وف وسطه مجموعة سكاكين
بعدين تفوت الرفاعية
والمجذوببين والسطلية
والنشالين والحرامية
وبتوع أبوزعبل رخرين
وبشوف بقي أخر الزقة
حنطور عليه كشمير لفه
وعربجي ومملوك خفة
عليه زواق ورد وياسمين
وفيه ولد جربان أعور
قاعد يمخط ويبربر
وزر طربوشه أزعر
وكل حالة زي الطين
الواد بيلعب حادي بادي
والحاج عيسي الحلاق جي
أعمي نظر ما بشوفش الضي
وكلبتينه مصديين
جابوا المطاهر يقطع له
وأبو المطاهر يدفع له
وأم الولد تتشخلع له
والباقي بالزغاريد راقعين
هات الكنافة يا متولي
يقول له فين هي قول لي
يقول له عندك عا لعلي
أرمح قوام يا ابن الملاعين
يروح يجيبها في صينية
نحاس عتيقة مصدية
واللي يطول منها وقية
بيات مغطي يامستمعين