من قال دوسر حلف قلنا له بدا
ومن شط وأخطا نردعه متمكنين
حنا عيال العود زايد وأعضدا
وهو الأسد ابن الملوك الأكرمين
دوسر يلقب به وصارت له ندا
وهو ترى جد الدواسر أجمعين
حنا سلايل الأزد ملوكٍ وعقدا
وبجدنا عمرو بن عامر مقتدين
حنا اهل مأرب ومنها المبتدا
وحنا وسط نجد وجنوبه راسيين
واللي وزا معنا لقى العز وغدا
منا وفينا نحتميه وله نعين
موروثنا اللي نحفظه طول المدا
بأوثق كتب الأنساب عند الأقدمين
في القرن الأول ذكرنا جاله صدا
عند ابن الكلبي والغساني ثابتين
والحميري وابن إياس معددا
والطبري والقلقشندي كاتبين
وعند السخاوي وابن الجرمي مسندا
وابن فضل الله والحمداني شاهدين
وابن المجاور وابن الهجري ورّدا
والمرعشي وابن الأثير موثقين
وعند المغيري وابن جاسر افردا
والحيدري وابن البسام مورخين
ولبن جريس حسين راي مسدّدا
مخطوطته تحكي روايات السنين
وابن عقيل الظاهري فينا شدا
وابن خميس وابن الحقيل مرددين
وعند البدراني فايز رايٍ يُقتدا
وابن طويانٍ ذكرنا مرتين
ولويس وأوبنهايم وفلبي يشهدا
رحالةٍ بين العرب مستشرقين
منا الذي وسم عصا الجار وفدا
أميرنا وبسبابها سمي الضمين
عامر بن بدران له قول وحدا
قال اتسع يا برك همة مقدمين
ومنا الذي ضيّف قبيلة وابددا
ابن زياد الشيخ اهو خطل اليمين
شيخٍ ذبح عشرين فاطر وازودا
وأكباش واجد ما اقطبوها الحاسبين
وحنا مزبنة الدخيل أمن العدا
وجريس وابن مطرفٍ هم مثبتين
وحنا موسعة الحدود الجرهدا
يوم ان ابن نصار خذها باليمين
وحنا هل الريشه خذينها ضدا
وفي مجلس ابن قويد تاريخٍ ثمين
وحنا مقيدة الجمل يوم الكدا
يوم الرضيمه للعواني فازعين
في معركة واره لنا فعل وقدا
وحنا عمود الحرب في معركة تين
ويومٍ على الأتراك جا فيه أزهدا
في معركة الافلاج وحنا الغالبين
وحنا ودينا الجار فايز له ودا
يوم الجدار أنهى حياته محسنين
وحنا هل السيف الصقيل مجرّدا
وأهل الرماح اللي تشلشل حربتين
حنا الشجاعة والكرم كف الندا
خطلان الأيدي في زمان الجايعين
وحنا هل الخيل الأصيل الجرّدا
وحنا هل البل من سنين الغابرين