سمعت أصوات للسعير

سِمِعْت أصوات للسّعير

تِدْعِي وتِهْتِفْ للنّفير

علشان نشازها يضمّنا

والكلّ فاكرْ لمصر شاكرْ

وللقطيعه يجرّنا

فيه ناس تغنّي تسلمْ أيادي

وناس تغنّي تتشلْ عادي

وكله فاضي للشر ماضي

ومصر غايبه عن كل نادي

الكل يطمح للكرسي يربحْ

عمال يخوّن وف خصمه ينطحْ

يزرع شكوكه على كل مسرحْ

وبسرعه يحصد للشهره يِسْرحْ

في الصبح صاحبْ والظهر يجرحْ

ومصر تبكي أنا صرت مَسْبَحْ

لكل خاسر ولكل مربحْ

ولفكر جاني من غريبْ

عمال ينادي على القريبْ

سيبك يا مصري من رقيبْ

خليك معاي وكُلْ زبيبْ

وانكر بفكرك كل غيبْ

وافعل براحتك كل عيبْ

واخلعْ حياءك كنْ حبيبْ

واشربْ وعاشرْ مَنْ تُرِيدْ

ولفكر جاني بالحديدْ

يؤمر وِيِنْهَى في العبيدْ

ولسوطه يِشْهِرْ من بعيدْ

يا ويلو مَنْ يِنسى النشيد

يا ويلو من مرشد عنيد

هوّ اللي حامي شرعنا وهوّ السّديدْ

كأنّ دِيني لسه جايني من جديدْ

ولفكر يصطادْ في العكارهْ

عمّال يصفّقْ للزفارهْ

وفْ نِفْسُه تنهارْ كل شارهْ

لَ عايزها وسطى أو إمارهْ

عايزْ إشارته ف كلّ حارهْ

صوتها يغطّي عا لمنارهْ

والكل فاكر لمصر شاكرْ