سألتك ياكيانن ساكنن في داخل الأعماق
علامك .. مبعده عني ضلوعي حيل بردانه
تعالي يانظر عيني انا في داخلي مشتاق
أسولف بك على .. نفسي تقول اليوم ولهانه
وانا مدري وش الي بي ابد حالي ولاينطاق
تعابيري أساليبي جنوني زلزل أركانه
الا يامهجتي ..شوفي كذا ..حالي وصوف إدقاق
نشف جلدي على عظمي من الهجران واحزانه
كتبت احساسي الذابل على طيفك مع الاشواق
وانا ادري حبك بروحي ثقيلن حيل ميزانه
وانا ادري ( يابعد حيي ) غلانا داخله ميثاق
أغني بك تغني بي قصيده زانت ألحانه
( أناظر بك ) .. سما فكري مخيله دايمٍ براق
عطش روحي على برقك يخيل الغيم وأمزانه
على بحرك سفن روحي تناجي حزة الاشراق
لجل لا بان لي صبحك عشقت الصبح وألوانه
وأنا كلي فدا روحك .. حياتي والجفى حراق
الى منّك .. هجرتيني .. يزيد الشوق .. نيرانه
هِنا .. عمّرت بك داري هِنا شمّختك الآفاق
هِنا حبك وطن عمري شعب واعضاي سكانه