جيت المكان وشوق الآمال ناحلي
لاضاع حلم الشوف والحال ناح لي
الليل يوغل بي حنينه ليا هما
في خِرمس الديجور مابان ضاح لي
ليلً لفح بي من ذواري هبايبه
خايلت رحلن في مساريه راح لي
ديجورها في عتمته ما تباينت
لا نجم لا كوكب تبيّن ولاح لي
عرّافة الحرفين ما تمتم السحر
اللي شكيته.. للمطوّع وباح لي
قرى علي مما تيسر من الفرج
تمتم ونادى في قريني وصاح لي
كنه يقول اللي سكن في محاجري
عقبه غدى شفي من العام قاحلي
عروسة الأمواج مامرك البحر
ملح الزراق اللي مراره قراح لي
احتاج له لا طال وقتي وخانني
واخايله لا من تساوى وطاح لي
مهذب النونين لا طلْ واستوا
ممنوعة الوصفين وصفك متاح لي
من دقة محيسن ليا بان مضربه
على الضلوع العوج لاصحت آح لي
حطيتها في مهجتي لا تصاعبت
لو ثقلها أثقل على حمل كاحلي
مدري على ذيك البراري مكانها
والا تعدت بين خبتٍ وساحلي
مير الوكاد اني من أيام هايمً
اشحذ صبر والصبر بالحيل شاح لي