ماني بانا بن باز أو بن عثيمين
عبدالمجيد عقاب عبدالله أدري!
أنا سماحة مفتي الدمع والعين
والحزن لا استفتاني افتي ب: مدري!
مدري اروح لمين أو كيف أو فين
ادخل نفق واخرج وانا فوق كوبري!
اللي ذعن صدري بطعنات سكين
اهون من اللي طعنته وسط ظهري
لاقلت: يا رب، دمعتي قالت: آمين
ودمعتي توقف معي منذ صغري
يا وقت تعرفني وأنا عارفك مين
ومسوي معرف ومفهم ومدري
قرفت من بعدين بعدين بعدين
وقرفت من بدري وبدري وبدري
والحال زفت الطين يا وقتي الطين
يا عام ميلادي ويا عام هجري
وشفيك ساري تو الأحزان بتزين
يا ليل تو الليل بتنام بدري؟
خذ نجمتك خذ ظلمتك معك الاثنين
وأنا ودمعي ننتظر فيلم مصري!
تضرب وتسبقني بتشكي على مين
يا حزن يا خواف تضرب وتجري