النهاردة الأبله فى المدرسة
قالت لى قوم يا ولد وقول للفصل شغلة أبوك
وشى بقى أحمر وما عرفتش أرد
ساعتها
لمحت عصفورتين على الشباك
وطرت وياهم
وكنت مستعرب قوى
إزاى عشهم هايساعنى
فوق الشجر سما مش زى اللى نعرفها
والقمر معلقينه ع الفروع
ومونسين نوره بالرفرفة
بيضحكوا مع كل حدوته
وكل ما الحدوتة تكمل
العش يوسع والشمس تبعد بعيد
أنا قولت ممكن أقولكم حدوته
الرفرفة خلت إيديا تنمل
أبويا يا ولاد الهوا والريح
عطار وشغلته فى المسك والعنبر
واتجوز أمى بإزازة ريحان
لسه مونسه طرحتها
واحنا اتولدنا كلنا ع الفرن
ريحان ومسك ودفا
وفهمنا معنى الرفرفة
كبرنا روحنا المدرسة
وعرفنا معنى الحزن
بس ما فهمناش سؤال الأبله
عارف يا رب
أنا نفسى أرجع تانى
للرفرفة
وأقول حكاياتى للعصافير
يا رب ينفع