ليه انا اعشق وصالك
وانتي دايم جافيه
وليه انا حالي كسيفه
وانتي المتعافيه
وليه انا لي قلب وافي
وليه منتي وافيه
لازم قلوب الحبايب
يالغلا متصافيه
حرّكي فيك المشاعر
والمعاني الطافيه
لولا نيران(ن) بصدري
مانظمت القافيه
أمشي عادي وآتبسم
وبي جروح خافيه
والهواجيس أتعاقب
وكلها متوافيه
لو أنا فاهم ضميرك
كان بلعت العافيه
وما مشيت بجمر موقد
وأنا رجلي حافيه
أبغى معسول الكلام
والحكاوي الدافيه
ودي احيا بالغرام
والنوايا الصافيه
أسمعي أحلى كلامي
و اقبلي لي لافيه
وسمّعيني احلى كلمه
من شفاك الشافيه
أنتي لاقلتي أحبك
هذي منك كافيه