تحيا مصر تحيا بينا
مهما شوفنا أو قاسينا
تحيا هيا بس يا بني
تحيا هيا وطظ فينا
تحيا مصر تحيا بينا
مهما شوفنا أو قاسينا
زي ساقيه أو رحايه
زي دنيا ودايره بينا
كله حافظ يابني دوره
وأحنا لسه الدور علينا
تلقى دورك جي بطلقه
أو بقطر يدوس علينا
أو تموت غرقان يا فندم
جوه مركب أو سفينه
لو لسانك يوم يخونك
قولت ليه بيبيعوا فينا
ليه يا ناس بيبيعوا نيلنا
ليه يبيعوا أرض سينا
تلقى فجأه سجون جنابو
فاتحه بابها وبتنادينا
أصل يابني سجون بلادي
حضن دافي وهيتاوينا
الحديد شاحح وغالي
بس لابسينه ف أدينا
تحيا مصر تحيا بينا
مهما شوفنا أو قاسينا
بس لما قالوا تحيا
نسيوا بس يقولوا لينا
هي لما مصر تحيا
تحيا ليهم... ولا لينا؟
تحيا ليهم بس يابني
واحنا بح..وطظ فينا
تحيا للبيه اللي صيف
جوه شرم.. أو مارينا
تحيا للباشا اللي سلم
ع الأعادي.. وبيعادينا
تحيا للكعب اللي عاالي
تحيا للبال اللي خالي
تحيا للكلب المعفن
بس لابس لبس غالي
تحيا مش للشقيانين
واللي بايعين البلاطه
تحيا للي بينهبوها
واللي سايقين الألاطه
تحيا للفاجرة اللي رقصت
تحيا للشيخ اللي طاطا
تحيا للدقن اللي خابت
أو لفيفي.. أو لدينا
تحيا ليهم بس يابني
واحنا بح..وطظ فينا