مش طافش
بحبها
ومهرها غالي
وحالها...!
أغلب من حالي
حابسينها في البرج العالي
والعيشه
إزاي تحلي لي؟
والعمر ضايع ف المشاوير
عازيني أطفش؟
مش طافش...!
أنا حر
ويقولوا دا طايش
في عروقي
بيها انا عايش
ما علتي حبها كابش
هيه الحقيقة والتصاوير
من صغري هيه في عيوني
كتاب إيماني وظنوني
وهجرتي
وسكني وعوني
فاكرها والكل نسوني
في رحلتي والدرب عسير
الخوف بيحكم
وبيقضي
والحكم جاهز
وبيمضي
بيعدموا ف عمري ووعدي
وبعثي منبعه من عندي!
مانا صانف رافض للتكسير
لا خوفي من سيف ولا قلعه
ولا ديابه
ف غنمي بترعي
انا زرعه
تنبت من زرعه
والشمس لو غابت
طالعه
والمدنه ترجع للتكبير
غلبان
ولكن مش واطي
ولهان
وعمري ما هاطاطي
ما انا قاري مكتوب الآتي
جنحاتي نابته من باطي
ولبرجها العالي
راح وأطير