اثر المواجع يا حمد مثل الايام

اثر المواجع يا حمد مثل الايام؟

تحسب ضمن عمر المحبّ وسنينه؟

لا هيب لا تشرى ، ولا هيب تنسام

لو يدفع الرجّال ما في يدينه

حشيمة حشامٍ لأجل خاطر حشام

ثمينةٍ تهدى ب( يمنىً ) ثمينه

واللي خذت قلبي هديّه من العام

جتني تردّه ، قلت: عندك رهينه

حتى لو ان البعد في وضع الإتمام

لا من عطيتك شي ، لا ترجعينه

اخذيه دامه يشبهك عشق وأحلام

وإنتي ب( نبلك ) ف( الهوى ) تشبهينه

اخذيه وابكي ، وآنا مثلك ، واذا لام

قلبك عيوني ، قلت: تستاهلينه

دمعٍ على طاري موادعك مقدام

لو قصّر الله يعمي اليوم عينه

راحت وخلتني خصيمٍ ل( الأوهام )

قلبي نهشه الحزن ، وافرغ حنينه

راحت وجا شامت وعاذل ولوّام

ولا كل غايب لا حضر ، فاقدينه

بعض الحضور اشبه ب( طعنات ) جزّام

وبعض الحضور اشبه ب( فرحة ) حزينه

وبعض المفارق مثل حكمٍ بالاعدام

لا مر روحٍ تلّها في يمينه