انا اللى محتاج لك تانى
حضنك يرجعلى كيانى
أخطى عتمة احزانى
يشقشق النور جوايا
ياشمس عمرى وايامى
انا بيكى بسبق احلامى
وبنسى عذابى الامى
ودنيتى وانتى معايا
بفرد جناح الغنا وباطير
ف عينيكى يام عيون مشاوير
مكتوب على امشيها اسير
ماملكش غير بس هوايا
وارمح بقلبى وشوقى واطوف
حواليكى زى الخيل ملهوف
اكسر حدود البوح والخوف
لجامى همسة وضحكاية
اه يامتداد الهوى والروح
ضيك حنين بيفور ويفوح
وبسرك المكنون بيبوح
يا سرى ف ضحكى وبكايا
قلبى اللى مفطوم على ريحتك
على طهر قلبك وسماحتك
عايش وبس عشان راحتك
لا همة تعبى ولاشقايا
ماانتى الغنا لحظة مايكون
صافى وبرئ وبسيط وحنون
طول عمرى حبك شوق مجنون
مالوش بدايه ولا نهاية
خدينى حبة ف كردانك
او ميل بيرقص ف عيونك
بغنايا هغسل احزانك
ياريت تردى على غنايا
وان تهت منك ف البدايات
هزرع حنينى وشوقى رايات
مدام ف قلبك المرايات
كاشفة لى روحى وجوايا